| 一年冇update後第一個post岩岩辭左工, 呢排好得閒成日睇人地D Blog.
有Blog 友問到,又諗返起自己原來有個咁既Blog.
見人地寫得咁開心, 自己得閒的話或者又可以寫返幾個post.
原本都係打算當係一個日記, 自己寫俾自己睇.
不過估唔到有時都會見到有人撞到入黎.
睇返自己之前寫既野, 都覺得幾得意.
勾返起好多當時覺得有趣, 但現在已經忘記左既回憶.
仲有最開心既係睇到自己之前訂下搬返亞洲呢個目標,
終於都可以實現. 係美國已經係第十年. 我記得我未過黎美國之前,
阿媽有個精通術數既朋友幫我起左支掛,
話我會係美國十年先返香港.
結果而家真係中左. 到底係個預言真係咁準,
定係咁岩撞中, 又或者係自我實踐預言, 我真係唔肯定.
不過我一直都信一命二運三風水, 四積陰德五讀書.
最少活左呢二十幾年, 幸運之神一直都係身邊.
既然係咁的話, 樂觀咁相信自己命運一直都會咁好,
或者真係會為自己繼續帶來好運.
我都相信念力. 我覺得只要你相信自己可以逹到一個目標,
潛意識就會令自己係不知覺間做左好多野,
令自己無意之間拉近同目標既距離.
仲有幾個月就到三十歲, 覺得好多事情都係三十歲前
呢個關口前完滿結束. 感情, 事業, 同居住地都係.
馬年出世既人今年沖大歲, 術數話會有好多轉變,
結果都好似幾準. 好期待進入呢個人生既新階段.
孔子話三十而立, 我都覺得自己應該開始花多D時間
諗諗人生既方向, 諗下自己想過一個點樣既人生.
六月新工開工, 希望可以係五月放假呢段時間做多D之前一直想做,
但冇時間做既野, 唔好浪費左難得有呢一個月放假既時間.
或者會再學下打Golf, 考返個上年應該考既航海執照,
睇多幾本好書, 再學好D英文, 有時間或者試下學少少日文,
旅行(可惜Visa問題唔可以出境, 所以要係美國境內),
多D同朋友出去玩 (paintball, white-water rafting 都未玩過,
, 跳降傘都想試下, 不過要小心D唔好樂極悲) 仲有要係走之前
去Carnegie Hall 聽一次Symphony/Concerto,
去Lincoln center 睇一次Opera, 或者睇多一兩個Musical.
數數下, 發覺原來都有好多野想做, 希望可以做到多D.
而且仲要花D時間準備一下新工需要既資料, 花D時間搬屋,
拎D野去捐同賣咁. 或者要好似係大學時咁,
將呢個五月每日想做既野寫低, 提醒自己唔好成日
無無聊聊係屋企乜都冇做過咁就過一日.
呢個 post 可能都可以做到提醒自己唔好浪廢晒D時間既作用.
過左呢兩年返工等放工, 渾渾厄厄既日子, 開始又覺得自己多返D
向上動力同做人目標. 感覺幾好, 希望可以繼續維持. |
