又到年尾, 又來個總結
話咁快又過左半年.
今年都好多轉變, 多數都係變好, 變得開心過以前
想轉工同離開美國諗左好多年, 終於今年轉到
新工做自己想做既野, 同事老闆好好人, 好多野學,
同舊女友分左手, 結束左一段好長又好痛苦既關係.
係新加坡識到好多新朋友,
可以唔洗日日食以前公司 Cafeteria 成日都一樣既野
仲有係早兩日升職,  都幾開心.
見到好多朋友早一兩年都升到呢個位
而家到自己, 有D 覺得終於有D收成既感覺.
副總裁個名聽落都好似幾威咁, 哈,
雖然係人都知其實淨係得個名, 說穿都係彈散一名.
我諗明年應該都會係好辛苦既一年.
早一陣子諗起有樣野幾得意
上年係豬年, 個個都發到豬頭咁
今年係鼠年, 個個都唔見左好多錢
出年係牛年, 會唔會個個都要做到隻牛咁又冇回報呢?
係的話都算唔錯, 起碼代表大家都仲會有份工做.
不過或者係通脹會好嚴重, 賺左錢都買唔到野都唔定.
點都好, 總好過一齊失業既.
或者明年都係勤勤力力, 希望到虎年虎虎生威會好D啦.